Nahazo Olomasina roa indray ny Fiangonana

Tomefy olona vao maraina ny Kianjan’ny Kôlejy “Masina Misely” – Amparibe ny Alahady 27 avrily, izay nanandratana ho Olomasina ny Papa Joany faha-XXIII sy ny Papa Joany Paoly faha-II. Sorona Masina niombonana tamin’ny Kristianina Katôlika maneran-tany io, fa indrindra fiombonam-po tamin’ny Papa François sy ny kristianina zavon-tany tany Roma toerana nanaovana ny fananganana ho Olomasina.

Ny Diôsezy tsirairay sy ny Distrika ary ny Paroasy dia samy nanana ny fandaminany na teo amin’ny vavaka hateloan’andro nanomanana izao fotoan-dehibe izao na ny hetsika samy hafa. Tamin’ny 8 ora sy sasany no nanomboka ny Sorona Masina notarihin’ny Arseveka Mgr Odon Marie Arsène Razanakolona niaraka tamin’ny Eveka mpanampy Mgr Jean de Dieu Raoelison sy Pretra marobe.

Hatrany am-panombohana dia efa nosoritsoritan’ny Arseveka ny momba ireto Olomangan’ny Fiangonana ireto sy ny zava-bitany fahavelony. Nasongadiny manokana ny Papa Joany Paoly faha-II izay Papa voalohany namangy an’i Madagasikara tamin’ny taona 1989, fotoana nananganany ho Olontsambatra an’i Victoire Rasoamanarivo. Sambatra isika hoy izy satria efa nandalovan’Olomasina ny tanintsika ary maro amintsika tafavory eto no nahita maso ny Papa Joany Paoly faha-II sy niresaka taminy. 

Anisan’ny nanome voninahitra izao fotoan-dehibe izao ny Filohan’ny Repôblika Atoa Hery Rajaonarimampianina sy ny vadiny, ny Piraiminisitra Kolo Roger sy ny vadiny, ireo Filoham-pirenena teo aloha Didier Ratsiraka sy Zafy Albert, Minisitra sasantsasany sy olo-manan-kaja hafa.

Teo am-pamaranana, dia nanao tatitra kely mikasika ny resadresaka nifanaovan’ireo Evekan’i Madagasikara nihaona tamin’ny Papa François tamin’ny fitsidihana nataon’izy ireo tany Roma ny volana Marsa teo ny Arseveka. Rehefa izany dia nomeny ny tso-drano ny rehetra.